ಬೆಳ್ತಂಗಡಿ: ದಸರಾ ಹಬ್ಬದ ಪ್ರಯುಕ್ತ, ತುಳುವ ತುಡರ್ ತಂಡದ ಸದಸ್ಯರು ಬಣ್ಣದ ವೇಷಧಾರಿಗಳಾಗಿ ಜನರನ್ನು ಮನರಂಜಿಸುತ್ತಾ ಮಾನವೀಯ ಸೇವೆಯೊಂದಕ್ಕೆ ಕೈ ಹಾಕಿದ್ದಾರೆ. ಮೂರನೇ ವರ್ಷವೂ ಕೂಡ ಈ ತಂಡವು ತಮ್ಮ ವಿಶಿಷ್ಟ ವೇಷಭೂಷಣಗಳ ಮೂಲಕ ಸಂಗ್ರಹಿಸಿದ ಹಣವನ್ನು ನಿಸ್ವಾರ್ಥವಾಗಿ ಸಮಾಜ ಸೇವೆಗೆ ನೀಡಿದೆ.
ಈ ಸಲ, ಬೆಳ್ತಂಗಡಿ ತಾಲೂಕು ಕುಕ್ಕಳ ಗ್ರಾಮದ ಕೆಂಪರಿಗೆ ನಿವಾಸಿಯಾಗಿರುವ ಶ್ರೀನಿವಾಸ್ ಎಂಬವರು ಕಳೆದ 9 ವರ್ಷಗಳಿಂದ ವೆರಿಕೋಸ್ ಕಾಯಿಲೆಯಿಂದ ಬಳಲುತ್ತಿದ್ದು, ಚಿಕಿತ್ಸೆಗಾಗಿ ಅಗತ್ಯವಿರುವ ಹಣವನ್ನು ಸಂಗ್ರಹಿಸುವುದರಲ್ಲಿದ್ದರು. ಈ ಸಂದರ್ಭ, ತುಳುವ ತುಡರ್ ತಂಡದ ಸದಸ್ಯರಾದ ಮನೀಶ್ ಡಿ ಶೆಟ್ಟಿ, ಶರಣ್, ರಾಜು, ಬಸವರಾಜ್, ಸುದೀಪ್, ಬನ್ವಾಸ್, ಧನ್ವಿನ್, ಅಶ್ರಿತ್, ಅಶ್ವಿತ್ ಹಾಗೂ ರಜತ್ ಅವರು ದಸರಾ ಹಬ್ಬದಂದು ಬಣ್ಣದ ವೇಷ ಧರಿಸಿ ಮನರಂಜನೆ ನೀಡುವ ಮೂಲಕ ₹28,125 ಮೊತ್ತವನ್ನು ಶ್ರೀನಿವಾಸ್ ಅವರ ಚಿಕಿತ್ಸೆಗೆ ನೀಡುವ ಮೂಲಕ ಶ್ಲಾಘನೀಯ ಕಾರ್ಯ ಕೈಗೊಂಡಿದ್ದಾರೆ.
ಈ ಸಮಯದಲ್ಲಿ ಗೋಪಾಲಕೃಷ್ಣ ಶೆಟ್ಟಿ ಅವರು ಸಹ ಉಪಸ್ಥಿತರಿದ್ದು, ತಂಡದ ಈ ಸಾಮಾಜಿಕ ಜವಾಬ್ದಾರಿಯ ಮನೋಭಾವನೆಗೆ ಬೆಂಬಲ ನೀಡಿದರು.
ತುಳುವ ತುಡರ್ ತಂಡದ ಅಭಿಪ್ರಾಯವು — “ಬಣ್ಣದ ವೇಷಭೂಷಣ ಧರಿಸಿ ಜನರನ್ನು ನಗಿಸಲು, ಮನರಂಜಿಸಲು ಸಾಧ್ಯವಾಗುವುದು ಒಂದು ಭಾಗ, ಆದರೆ ಅದರ ಮೂಲಕ ಸಮಾಜದ ಕಷ್ಟಗಳಿಗೆ ಸ್ಪಂದಿಸುವುದು ನಿಜವಾದ ತೃಪ್ತಿ ಮತ್ತು ದೇವರ ಸೇವೆ” ಎಂಬುದಾಗಿದೆ.
ಈ ಸೇವಾ ಕಾರ್ಯದಲ್ಲಿ ಕೈ ಜೋಡಿಸಿರುವ ಎಲ್ಲಾ ಸಹೃದಯ ದಾನಿಗಳಿಗೆ ತಂಡದ ಪರವಾಗಿ ಹೃತ್ಪೂರ್ವಕ ಧನ್ಯವಾದಗಳನ್ನು ಸಲ್ಲಿಸಿದ್ದಾರೆ.
