ಮಂಗಳೂರು: ಮಂಗಳೂರಿನ ಕದ್ರಿಯ ಲೋಬೊ ಲೇನ್ ಎಂಬಲ್ಲಿ ಮನೆಯಲ್ಲೇ ನಕಲಿ ವೈನ್ ತಯಾರಿಸುತ್ತಿದ್ದ ಘಟಕದ ಮೇಲೆ ಸೋಮವಾರ ಅಬಕಾರಿ ಇಲಾಖೆ ಅಧಿಕಾರಿಗಳು ದಾಳಿ ನಡೆಸಿ ಓರ್ವನನ್ನು ಬಂಧಿಸಿ, 5.57ಲಕ್ಷ ರೂ.ಮೌಲ್ಯದ ಸೊತ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.
ಬಂಧಿತ ಆರೋಪಿ ಕದ್ರಿಯ ಲೋಬೊ ಲೇನ್ ಮೈಕಲ್ ಬೈಸ್ ಮಿನೇಜಸ್ ಎಂದು ತಿಳಿದು ಬಂದಿದೆ.
ಬಂಧಿತನ ಮನೆಯಿಂದ 238 ಲೀ. ನಕಲಿ ವೈನ್, 1,500 ಲೀ. ವೈನ್ ತಯಾರಿಸುವ ಕೊಳೆ, 3.180 ಲೀ. ಮದ್ಯ, ನಕಲಿ ವೈನ್ ತಯಾರಿಸುವ ಸಲಕರಣೆಗಳನ್ನು ಜಪ್ತಿ ಮಾಡಲಾಗಿದೆ. ಆರೋಪಿಯನ್ನು ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಕುರಿತು ಆರೋಪಿಯ ವಿರುದ್ಧ ಪ್ರಕರಣ ದಾಖಲಾಗಿದೆ.
